O‘zbekistonlik 41 yoshli L.R. ismli ayol 26 yoshli turkiyalik Ahmad Uzmen tomonidan amalga oshirilgan firibgarlik qurboniga aylandi.
OAV ma’lumotlariga ko‘ra, erkak internet orqali ayolning ishonchini qozongan va u bilan baxtli oila qurish hamda birgalikdagi kelajak haqida va’dalar bergan.
Ma’lum bo‘lishicha, munosabatlar boshida Ahmad L.R.ga ular birga yashashi uchun kvartira sotib olganini aytgan. Uy jihozlash uchun ayol unga 3,5 ming AQSh dollari o‘tkazgan. Vaqt o‘tishi bilan erkak yangi uy sotib olish bahonasida yanada ko‘proq pul talab qila boshlagan va bu safar L.R. unga 30 ming dollar yuborgan.
Keyinchalik firibgar shaxsiy ma’lumotlarini sezilarli darajada buzib ko‘rsatgani aniqlangan. U o‘zini 35 yoshda deb tanishtirgan, biroq aslida 26 yosh bo‘lgan. Turli OAV baholariga ko‘ra, ayol “bo‘lajak turmush o‘rtog‘i” uchun jami qariyb 290 ming AQSh dollari sarflagan.
Mutaxassislar ta’kidlashicha, nikoh va’dasi bilan bog‘liq internet-tanishuvlar ko‘pincha moliyaviy firibgarlar uchun vositaga aylanadi. Jabrlanuvchilar suhbatdoshning so‘zlariga ishonib, uning shaxsini tekshirmasdan yirik mablag‘larni o‘tkazib yuboradi.
Turkiya huquqni muhofaza qiluvchi organlari hodisa yuzasidan tergovni davom ettirmoqda. Voqeaning barcha tafsilotlarini aniqlash va Ahmad Uzmenni javobgarlikka tortish bo‘yicha ishlar olib borilmoqda.
