Yaqin Sharqda vaziyat keskinlashdi. Isroil Eron hududiga qarshi harbiy operatsiya o‘tkazganini rasman tasdiqladi.
Isroil tomoni bayonotiga ko‘ra, harakatlar “profilaktik xarakterga ega” bo‘lib, milliy xavfsizlikka tahdidlarning oldini olishga qaratilgan. Operatsiya “Yehuda qalqoni” deb nomlangan.
Xalqaro OAV xabarlariga ko‘ra, Tehronda portlashlar sodir bo‘lgan, shuningdek, Eron hududidagi bir qator obyektlarga zarbalar berilgani qayd etilgan. Eron axborot agentliklari Luriston viloyati va Tabriz shahrida ham portlashlar yuz berganini ma’lum qilgan. Poytaxtning ayrim hududlarida mobil aloqa va internetda uzilishlar kuzatilgan.
Isroil butun mamlakat bo‘ylab favqulodda holat e’lon qildi. Rasmiylar Eron tomonidan javob raketa hujumlari ehtimoli yuqori ekanini ogohlantirdi. Isroil havo hududi fuqarolik samolyotlari uchun vaqtincha yopilgan.
O‘zbekistonning Isroildagi elchixonasi vatandoshlarni xavfsiz joylarda bo‘lishga, ehtiyot choralariga qat’iy rioya qilishga va Isroil Orqa front qo‘mondonligi ko‘rsatmalariga amal qilishga chaqirdi. Diplomatik missiya raketa hujumlari istalgan vaqtda boshlanishi mumkinligini ta’kidladi.
G‘arb nashrlari, jumladan New York Times, zarbalar mintaqadagi AQSh harbiy bazalari va aviatsiya tashuvchilarida joylashtirilgan aviatsiya vositalari orqali amalga oshirilayotganini yozmoqda. Rasmiy Vashington tafsilotlarni ochiqlamagan, biroq xavfsizlik masalalarida Isroil bilan muvofiqlashtirish mavjudligini tan olgan.
Ayrim OAVda zarbalarning ikkinchi bosqichi va Tehron yaqinidagi strategik infratuzilma obyektlari, shuningdek, Isfahon, Qum, Karaj va Kermonshohdagi nishonlar urilgani haqida xabarlar paydo bo‘ldi. Ushbu ma’lumotlarning bir qismi rasmiy tasdiqni talab qiladi.
AQShning Qatardagi elchixonasi amerikalik fuqarolarga xavfsizlik choralarini ko‘rish va boshpanalarda qolish bo‘yicha ogohlantirish tarqatdi. Mintaqaning boshqa qator davlatlarida ham shunga o‘xshash ehtiyot choralari joriy etilgan.
Vaziyat fonida qo‘shni davlatlarda ham beqarorlik saqlanmoqda. Ayrim xabarlarda Afg‘oniston va Pokiston o‘rtasidagi taranglik davom etayotgani qayd etilib, bu mintaqaviy xavflarni yanada oshirmoqda.
Tahlilchilar ogohlantirishicha, keyingi keskinlashuv butun Yaqin Sharq xavfsizligiga ta’sir ko‘rsatishi, shuningdek, jahon energetika bozorlari va global iqtisodiyotga salbiy ta’sir qilishi mumkin. Geosiyosiy tanglik fonida neft narxlarining oshishi qayd etilmoqda.
Vaziyat dinamik tus olgan. Tomonlarning rasmiy bayonotlari kelishda davom etmoqda, xalqaro vositachilar esa vaziyatni diplomatik yo‘l bilan hal etishga va vazminlikka chaqirmoqda.
