Bektemir tumanidagi «Qo‘yliq» dehqon bozori faoliyati yong‘in xavfsizligi talablari buzilgani sababli qisman to‘xtatildi. Bozorning bir qismi elektr energiyasidan uzildi.
Toshkent shahar Favqulodda vaziyatlar bosh boshqarmasi poytaxtning Bektemir tumanida joylashgan «Qo‘yliq» dehqon fermer bozori faoliyatini qisman vaqtincha chekladi.
Ushbu qaror bozorda o‘tkazilgan tekshiruvlar davomida yong‘in xavfsizligi talablari jiddiy ravishda buzilgani aniqlangani sababli qabul qilindi. Cheklov chorasi sifatida bozor hududining bir qismi elektr energiyasi ta’minotidan uzib qo‘yildi. Mutaxassislarning ta’kidlashicha, aniqlangan kamchiliklar yong‘in kelib chiqish xavfini oshiradi hamda fuqarolarning hayoti, salomatligi va mol-mulki xavfsizligiga bevosita tahdid soladi.
Bozorning to‘xtatilgan qismi faoliyati va savdo nuqtalari aniqlangan barcha kamchiliklar hamda yong‘in xavfsizligi bo‘yicha qoidabuzarliklar to‘liq bartaraf etilgandan so‘ng qayta tiklanadi.
