Qishda issiqlik yetarli bo‘lmagan ko‘p kvartirali uylarda Jahon banki ko‘magida kompleks energiya auditi o‘tkazilmoqda. Tizim uchun yangi isitish metodologiyasi ishlab chiqiladi.
Loyiha boshlanishi va obyektlarni saralab olish
Toshkent shahrida ko‘p kvartirali uylarning energiya samaradorligini oshirish va issiqlik yo‘qotishlarini kamaytirish bo‘yicha Jahon banki bilan hamkorlikdagi amaliy tadbirlarning navbatdagi bosqichiga start berildi. Iyul oyi oxirida kelishilgan ushbu tashabbus doirasida poytaxt hokimining uy-joy kommunal xo‘jaligi masalalari bo‘yicha o‘rinbosari O.Muminov boshchiligida manzilli o‘rganishlar o‘tkazildi. Natijada o‘tgan issiqlik mavsumida belgilangan me’yoriy harorat darajasida isitilmagan hamda aholidan e’tirozlar tushgan ko‘p qavatli uylar alohida ro‘yxatga olindi.
Kompleks energiya auditini o‘tkazish tartibi
21-sentyabrdan boshlab ushbu uylarda Jahon banki mutaxassislari jalb qilingan holda kompleks energiya auditi o‘tkazilmoqda. Audit jarayonida xalqaro ekspertlar maxsus instrumental o‘lchov uskunalaridan foydalangan holda binolarning texnik holatini, tashqi devorlar, tom, yerto‘la, eshik va derazalarning issiqlik saqlash qobiliyatini, shuningdek, ichki isitish tizimlarining samaradorligini sinchiklab o‘rganmoqda. Ushbu tadbirlar har bir uydagi issiqlik yo‘qotilishining asosiy sabablarini aniqlash hamda ularni bartaraf etish bo‘yicha aniq texnik yechimlarni ishlab chiqish imkonini beradi.
O‘rganishlar yakunlari bo‘yicha Toshkent shahridagi ko‘p kvartirali uylarni samarali isitish bo‘yicha yagona metodologiya yaratilishi ko‘zda tutilgan. Hujjat binolarni energiya samaradorligi nuqtayi nazaridan baholash, modernizatsiya qilinishi lozim bo‘lgan obyektlarni aniqlash hamda tabiiy gaz va elektr energiyasidan oqilona foydalanish bo‘yicha manzilli chora-tadbirlarni belgilashga xizmat qiladi. Eslatib o‘tamiz, bino va inshootlarning energiya iste’molini auditdan o‘tkazishning rasmiy tartibi Hukumat qarori bilan 2024-yilda tasdiqlangan edi.
Izohlar
Hozircha izohlar yo‘q