Toshkentda 27 yoshli qizning intim fotosuratlari va videolarini tarqatmaslik evaziga 3 000 dollar talab qilgan 31 yoshli erkak ushlandi. Unga nisbatan jinoyat ishi qo‘zg‘atildi.
Toshkent shahrida yosh qizga tegishli intim xarakterdagi fotosurat va videolarni tarqatish hamda yaqinlariga ko‘rsatish bilan tahdid qilib, pul talab qilgan 31 yoshli fuqaro qo‘lga olindi.
Tezkor tadbir 27 yoshli jabrlanuvchi ayolning murojaati va arizasi asosida o‘tkazildi. Gumonlanuvchi unga tegishli shaxsiy va intim materiallarni tarqatmaslik hamda uni oila a’zolari va yaqinlari oldida sharmanda qilmaslik evaziga 3 000 AQSH dollari berishni talab qilgan.
31 yoshli gumonlanuvchi shaxs so‘ralgan pul mablag‘ini olayotgan vaqtida ashyoviy dalillar bilan ushlandi.
Mazkur holat yuzasidan ushlangan shaxsga nisbatan Jinoyat kodeksining 165-moddasi 1-qismi (Tovlamachilik) bilan jinoyat ishi qo‘zg‘atilib, hozirda tergov harakatlari olib borilmoqda.
