Sergeli tumanida tijorat banki xodimlari fuqaroning 500 ming dollarlik omonatidan 300 ming dollarini qalbaki hujjatlar orqali o‘zlashtirgani fosh etildi.
Hujjatlarni qalbakilashtirish va o‘zlashtirish tafsilotlari
Bosh prokuratura huzuridagi Departamentning Sergeli tumani bo‘limi tomonidan o‘tkazilgan tergovga qadar tekshiruvda poytaxtdagi tijorat banklaridan birining mas’ul shaxslari sodir etgan noqonuniy harakatlar fosh etildi.
Bank xodimlari fuqaro I.M. tomonidan bankka omonatga qo‘yilgan 500 ming AQSH dollarining 300 ming dollarini fuqaro nomidan qalbaki ariza va boshqa hujjatlarni rasmiylashtirish yo‘li bilan o‘zlashtirib, talon-toroj qilgan.
Jinoyat ishi qo‘zg‘atilishi
Ushbu holat yuzasidan bankning mas’ul shaxslariga nisbatan O‘zbekiston Respublikasi Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atildi. Hozirda tegishli tergov harakatlari olib borilmoqda.
