Shayxontohur tumanida aylanmasi qariyb 10 mlrd so‘m bo‘lgan «soya»dagi kripto-birja aniqlandi. 229 ta bank kartasi va 22 ta smartfon musodara qilindi.
Toshkent shahar IIBB xodimlari poytaxtning Shayxontohur tumanida kripto-aktivlarning noqonuniy aylanmasini tashkil etgan jinoiy guruh faoliyatiga chek qo‘ydi. Tezkor-qidiruv tadbirlari davomida 24 yoshli A.M. va 22 yoshli B.Z. ismli shaxslar qo‘lga olindi. Ular tegishli litsenziyaga ega bo‘lmagan holda, ijtimoiy tarmoqlar va maxsus dasturiy ta’minot orqali raqamli valyutalarning «soya»dagi savdosini yo‘lga qo‘yganlikda ayblanmoqda.
Tergov ma’lumotlariga ko‘ra, 2025-yil iyulidan 2026-yil yanvarigacha bo‘lgan davr mobaynida gumonlanuvchilarning hisob raqamlari orqali qariyb 793 ming USDT (raqamli dollar) o‘tgan. Bu esa milliy valyuta ekvivalentida 9,66 milliard so‘mdan ortiq mablag‘ni tashkil etadi. Noqonuniy ayirboshlash punkti joylashgan xonadonni ko‘zdan kechirish davomida huquq-tartibot idoralari xodimlari katta hajmdagi texnik vositalar arsenalini: kompyuter texnikasi, 22 dona smartfon va turli banklarga tegishli 229 dona plastik kartalarni ashyoviy dalil sifatida musodara qilishdi.
Mazkur holat yuzasidan O‘zbekiston Respublikasi Jinoyat kodeksining 278-8-moddasi (Kripto-aktivlarning noqonuniy aylanmasi) bilan jinoyat ishi qo‘zg‘atilgan. Ushbu modda sanksiyasi yirik miqdordagi jarimalardan tortib besh yilgacha ozodlikdan mahrum qilish jazosini nazarda tutadi. Hozirda ushbu yashirin tarmoqning barcha ishtirokchilarini va faoliyat ko‘lamini to‘liq aniqlash maqsadida tergov harakatlari davom ettirilmoqda. Mutaxassislar fuqarolarni kripto-aktivlar bilan bog‘liq operatsiyalarni faqat litsenziyaga ega bo‘lgan rasmiy platformalar orqali amalga oshirishga chaqiradi.
