«Navoiy» bojxona postida chaqalog‘ining pampersiga 200 gramm oltin yuyurtmasini va kiyimlariga 70 gramm zargarlik buyumlarini yashirib olib o‘tmoqchi bo‘lgan ayol ushlandi. Moliya qiymati 450 million so‘mni tashkil etdi.
Toshkent viloyatidagi «Navoiy» chegaralangan bojxona postida bojxona xodimlari tomonidan oltin va zargarlik buyumlarini mamlakat hududidan noqonuniy olib chiqib ketishga bo‘lgan navbatdagi urinishning oldi olindi.
Chegarani kesib o‘tayotgan ayol xodimlarning e’tiborini tortgan va u belgilangan tartibda shaxsiy ko‘rikdan o‘tkazilgan. Tekshiruv davomida ayol o‘zining emizikli chaqalog‘i tagligiga (pampers) umumiy og‘irligi taxminan 200 gramm bo‘lgan ikkita oltin quymasini yashirgani ma’lum bo‘ldi. Bundan tashqari, uning yonidan bojxona nazoratida ko‘rsatilmagan va deklaratsiyalanmagan 70 gramm og‘irlikdagi zargarlik buyumlari ham topildi.
Dastlabki hisob-kitoblarga ko‘ra, musodara qilingan oltin quymalari va zargarlik buyumlarining umumiy qiymati qariyb 450 million so‘mni tashkil etdi. Hozirda holat yuzasidan surishtiruv va tergovga qadar tekshiruv harakatlari olib borilmoqda.
Izohlar
Hozircha izohlar yo‘q