O‘zgidromet 21–24-iyul kunlari kutilayotgan yomg‘irlar sababli O‘zbekistonning to‘rtta viloyatidagi tog‘ oldi va tog‘li hududlarda sel-suv toshqini xavfi haqida ogohlantirdi.
Kutilayotgan yomg‘irlar sababli joriy yilning 21–24-iyul kunlari O‘zbekistonning tog‘ oldi va tog‘li hududlarida sel-suv toshqini hodisalari yuz berishi mumkin. O‘zgidromet xizmati agentligi xabariga ko‘ra, respublikaning to‘rtta viloyatida xavfli tabiiy hodisalar kuzatilishi ehtimoli yuqori. Tog‘li hududlarda yashovchi fuqarolar, dam oluvchilar hamda ushbu yo‘nalishlarda harakatlanuvchi haydovchilardan xavfsizlik choralarini ko‘rish so‘ralmoqda. Shuningdek, yog‘ingarchilik sababli ayrim joylarda yomg‘ir suvlari to‘planishi va bu hududlarni suv bosishiga olib kelishi mumkinligi ta’kidlandi.
Sel va suv toshqinlari xavfi quyidagi hududlarda e’lon qilingan:
-
Toshkent viloyatida: Ohangaron, Bo‘stonliq, Parkent, Pskent, O‘rta Chirchiq, Yuqori Chirchiq tumanlari hamda Angren va Olmaliq shaharlari;
-
Namangan viloyatida: Pop, Kosonsoy, Chortoq, Chust, Namangan va Yangiqo‘rg‘on tumanlari;
-
Farg‘ona viloyatida: So‘x, Shohimardon, Farg‘ona va Beshariq tumanlari;
-
Andijon viloyatida: Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlari va Xonobod shahri.
