O‘zbekiston prezidenti Shavkat Mirziyoyev Vladimir Zelenskiyni Ukraina Mustaqilligining 35 yilligi bilan qutladi. Zelenskiy minnatdorlik bildirib, do‘stlik va hamkorlikni kengaytirish muhimligini ta’kidladi.
Davlat rahbari o‘z tabrigida Vladimir Zelenskiyga mustahkam sog‘liq, oilaviy baxt, mas’uliyatli davlatchilik faoliyatida muvaffaqiyatlar, Ukraina xalqiga esa tinchlik va ravnaq tilagan.
“Bizning birgalikdagi sa’y-harakatlarimiz tufayli mamlakatlarimiz o‘rtasidagi an’anaviy do‘stlik rishtalari va o‘zaro hurmat tamoyillariga asoslangan munosabatlar bundan buyon ham izchil rivojlanib borishiga ishonchim komil”, — deyiladi prezident maktubida.
Ukraina prezidentining munosabati
Vladimir Zelenskiy samimiy tabrik uchun O‘zbekiston prezidentiga minnatdorlik bildirdi hamda ikki tomonlama aloqalarga yuqori baho berdi.
Zelenskiy o‘z munosabatida Ukraina O‘zbekiston bilan an’anaviy do‘stlikni o‘ta qadrlashini, o‘zaro hamkorlik, savdo va iqtisodiy aloqalarni yanada kengaytirishga sodiq qolishini ta’kidladi. U Shavkat Mirziyoyevga sihat-salomatlik, O‘zbekiston xalqiga esa tinch va farovon kelajak tiladi.
Eslatib o‘tamiz, O‘zbekiston rahbari har yili ukrainalik hamkasbiga ushbu sana munosabati bilan doimiy ravishda tabrik maktubini yo‘llab keladi. Avvalroq O‘zbekiston Tashqi ishlar vazirligi ham Ukrainani Mustaqillik kuni bilan qutlagan edi.
