O‘zbekiston Prezidenti XXR yetakchisiga mamlakat janubidagi suv toshqini va yirik yong‘in oqibatida o‘nlab insonlar qurbon bo‘lgani munosabati bilan hamdardlik yo‘lladi.
O‘zbekiston Respublikasi Prezidenti Shavkat Mirziyoyev Xitoy Xalq Respublikasi Raisi Si Szinpinga inson qurbonliklari va jiddiy vayronagarchiliklarga olib kelgan fojiali voqealar munosabati bilan rasmiy hamdardlik maktubini yo‘lladi.
Davlatimiz rahbari Xitoy janubidagi Guansi-Chjuan muxtor rayonida yuz bergan keng ko‘lamli suv toshqini, shuningdek, Fuszyan provinsiyasidagi yirik yong‘in oqibatida ko‘plab insonlar qurbon bo‘lgani va jarohatlangani munosabati bilan chuqur ta’ziya va qo‘llab-quvvatlash so‘zlarini izhor etdi. O‘z maktubida Shavkat Mirziyoyev halok bo‘lganlarning oila a’zolari va yaqinlariga samimiy hamdardlik bildirib, barcha jarohatlanganlar tezroq sog‘ayib ketishini tiladi.
Xalqaro axborot agentliklarining so‘nggi ma’lumotlariga ko‘ra, XXR janubidagi vayronkor suv toshqini oqibatida halok bo‘lganlar soni 39 kishiga yetgan, yana kamida to‘qqiz nafar mahalliy aholi bedarak yo‘qolgan deb hisoblanmoqda. Talafot ko‘rgan hududlarda qidiruv-qutqaruv operatsiyalari davom etmoqda.
