Shavkat Mirziyoyev Qozog‘iston prezidentiga maktub yo‘llab, yangi Konstitutsiya bo‘yicha tashkil etilgan bir palatali parlament — Qurultoyga o‘tkazilgan ilk saylovlar muvaffaqiyatli yakunlangani bilan tabrikladi hamda strategik ittifoqchilikni mustahkamlashga tayyorligini bildirdi.
O‘zbekiston lideri ushbu siyosiy voqeani Qozog‘iston davlat tizimini takomillashtirish, boshqaruv samaradorligini oshirish va qonun chiqaruvchi hokimiyat rolini tubdan kuchaytirishning yangi bosqichi sifatida baholadi.
Maktubda ta’kidlanishicha, fuqarolarning ovoz berish jarayonidagi yuqori faolligi Qosim-Jo‘mart Toqayev rahbarligida olib borilayotgan chuqur konstitutsiyaviy hamda ijtimoiy-siyosiy islohotlar, shuningdek mamlakatning xalqaro maydondagi obro‘sini oshirishga qaratilgan siyosat xalq tomonidan keng qo‘llab-quvvatlanayotganining yorqin tasdig‘idir.
Shavkat Mirziyoyev O‘zbekiston tomoni qardosh Qozog‘iston erishayotgan yutuqlardan samimiy mamnunligini bildirib, ikki davlat parlamentlararo hamkorligi ko‘p asrlik do‘stlik, yaxshi qo‘shnichilik va strategik ittifoqchilik ruhida yangi bosqichga ko‘tarilishiga ishonch bildirdi.
Izohlar
Hozircha izohlar yo‘q