Qozog‘iston poytaxtida Mintaqaviy ekologik sammit bo‘lib o‘tmoqda. Shavkat Mirziyoyev Ostona sammitida sakkizta tashabbusni ilgari surdi.
Ostonadagi Mintaqaviy ekologik sammitda so‘zga chiqqan O‘zbekiston Prezidenti Shavkat Mirziyoyev Markaziy Osiyoda iqlim o‘zgarishi global sur’atlardan ikki baravar tezroq kechayotganiga to‘xtalib o‘tdi. Davlat rahbari mintaqa muzliklarining qariyb uchdan bir qismi erib ketgani va suv resurslari taqchilligi ortib borayotganini qayd etdi.
O‘z chiqishida Shavkat Mirziyoyev xalqaro hamjamiyatni iqlimiy birdamlikka chaqirib, rivojlanayotgan mamlakatlar uchun zamonaviy texnologiyalar va moliyaviy resurslardan foydalanish adolatli bo‘lishi lozimligini ta’kidladi.
Tahdidlarga javob sifatida prezident sakkizta aniq tashabbusni taqdim etdi. Ular orasida «Markaziy Osiyo toza havosi» konsorsiumini tuzish, ekotovarlar uchun imtiyozli «Yashil savdo koridori»ni shakllantirish va mintaqaviy «Qizil kitob»ni nashr etish takliflari bor. Shuningdek, 2027-yilda O‘zbekistonda Butunjahon yoshlar iqlim forumini o‘tkazish tashabbusi ilgari surildi. Prezidentning so‘zlariga ko‘ra, ushbu chora-tadbirlarning amalga oshirilishi Markaziy Osiyoni ekologik farovonlik va barqaror rivojlanish maydoniga aylantirishga xizmat qiladi.
Izohlar
Hozircha izohlar yo‘q