O‘zbekiston Prezidenti Armaniston bosh vaziri Nikol Pashinyanga tabrik maktubi yo‘lladi. Davlat rahbari saylov natijalari xalqning amaldagi siyosatga bo‘lgan yuksak ishonchi ramzi ekanini qayd etdi.
O‘zbekiston Respublikasi Prezidenti Shavkat Mirziyoyev Armaniston bosh vaziri Nikol Pashinyanga uning rahbarligidagi “Fuqarolik shartnomasi” partiyasi parlament saylovlarida g‘alaba qozongani munosabati bilan rasmiy tabrik yo‘lladi.
Davlat rahbari o‘z qutlovida erishilgan ushbu natija arman xalqining mamlakatda olib borilayotgan ichki va tashqi siyosat kursiga, xususan, Janubiy Kavkaz hududida tinchlik hamda barqarorlikni ta’minlash borasidagi tizimli sa’y-harakatlarga bo‘lgan yuksak ishonchining amaliy isboti ekanini alohida e’tirof etdi.
O‘zbekiston yetakchisi ikki tomonlama sheriklik aloqalariga to‘xtalar ekan, birgalikdagi intilishlar va tashabbuslar kelgusida mamlakatlar o‘rtasidagi o‘zaro manfaatli hamkorlik ko‘lamini yanada kengaytirishga xizmat qilishiga ishonch bildirdi. Maktub yakunida Shavkat Mirziyoyev Nikol Pashinyanga mustahkam sog‘liq va mas’uliyatli davlat faoliyatida muvaffaqiyatlar, do‘st Armaniston xalqiga esa tinchlik-omonlik va qut-baraka tiladi.
Izohlar
Hozircha izohlar yo‘q