Senat Toshkentdagi elektro zaryad stansiyalari o‘chirilishi bo‘yicha Energetika vazirligidan izoh so‘radi

Oliy Majlis Senati Toshkentda elektromobillar uchun zaryadlash stansiyalarining o‘chirilishi masalasi yuzasidan Energetika vazirligidan rasmiy tushuntirish so‘radi. Bu haqda yuqori palata matbuot xizmati xabar berdi.

Senator Energetika vaziri nomiga so‘rov yuborib, so‘nggi paytlarda elektr transporti infratuzilmasi tez-tez elektr tarmog‘idan uzilayotgani sabablarini izohlab berishni talab qildi.

Senator so‘rovining asosiy talablari

Muammolar sababi:

Tadbirkorlar va elektromobil egalari zaryadlash stansiyalarining kutilmaganda o‘chirilishi bilan duch kelmoqda. Senat bunday choralar bo‘yicha aniq va asosli tushuntirish berilishini talab qilmoqda.

Sohani qo‘llab-quvvatlash:

So‘rovda hukumat tomonidan elektromobillar uchun zaryadlash infratuzilmasini rivojlantirish hamda ushbu sohada faoliyat yuritayotgan tadbirkorlarning investitsiyalarini himoya qilish bo‘yicha ko‘rilayotgan choralar haqida ma’lumot berish ham so‘ralgan.

Kelajak rejasi:

Energetika vazirligi bunday holatlarning takrorlanishini oldini olish bo‘yicha aniq strategiya ishlab chiqishi kerak. Chunki mavjud vaziyat fuqarolar va tadbirkorlar orasida norozilik uyg‘otmoqda.

So‘nggi yillarda O‘zbekistonda elektromobillar bozori tez sur’atlar bilan rivojlanmoqda. Biroq senator ta’kidlashicha, infratuzilmaning kengayishi ayrim kamchiliklar bilan kechmoqda va bu tadbirkorlar hamda oddiy foydalanuvchilarga salbiy ta’sir ko‘rsatmoqda.