Poytaxtdagi “Tatneft” shoxobchalarida Rossiya yoqilg‘isi sotuvdan umuman yo‘qoldi. RFning o‘zida esa eksportga taqiq qo‘yilgan va taqchillik kuchaymoqda.
Ayni paytda bekatlarda faqatgina O‘zbekistonning o‘zida ishlab chiqarilgan AI-92 markali mahalliy benzin sotilmoqda, xolos. Poytaxt shoxobchalarida xorijiy yoqilg‘ining g‘oyib bo‘lishi Rossiya Federatsiyasining o‘zida kuzatilayotgan keskin yoqilg‘i inqirozi davriga to‘g‘ri keldi.
So‘nggi haftalarda Rossiya hududlarida benzin taqchilligi eng yuqori nuqtaga chiqdi. Bir qator viloyatlarda cheklovlar joriy etilib, bir kishiga faqat 20 litrdan yoqilg‘i berilmoqda va idishlarga quyish taqiqlangan.
Rossiya bozorida benzin narxi rekord darajaga — litriga 126 rublgacha (taxminan 20 ming so‘m) qimmatlashdi. Mutaxassislar buni dronlar hujumi oqibatida neftni qayta ishlash zavodlari (NQIZ) va benzin tashuvchi maxsus texnikalarning shikastlangani hamda logistikadagi jiddiy muammolar bilan izohlamoqda.
Rossiya hukumati ichki bozordagi vaziyatni barqarorlashtirish maqsadida mamlakatdan tashqariga benzin eksport qilishni rasman taqiqlab qo‘ygan. Toshkentdagi AYoQShda Rossiya yoqilg‘isi qolmagani aynan ushbu eksport cheklovlari va Rossiya ichki bozoridagi taqchillikning to‘g‘ridan-to‘g‘ri oqibati bo‘lishi mumkin.
