Rossiyada armiyani diskreditatsiya qilish va feyklar tarqatishda ayblangan relokantlarning kvartiralari, mashinalari hamda bank hisoblari musodara qilinishi kutilmoqda.
Yangi tartibga ko‘ra Rossiya chegaralaridan tashqarida bo‘lgan relokantlarning kvartiralari, avtomobillari, bank hisobraqamlari hamda boshqa har qanday turdagi shaxsiy mulklari sud qarori bilan hibsga olinishi mumkin.
Ushbu qonuniy choralar birinchi navbatda Rossiya armiyasi obro‘siga putur yetkazish, qurolli kuchlar haqida yolg‘on ma’lumotlar tarqatish hamda xorijiy agentlar to‘g‘risidagi qonunchilik talablarini buzish bilan bog‘liq jinoiy va ma’muriy ishlar doirasida qo‘llaniladi.
Ushbu qonun loyihasi mualliflari va qonun chiqaruvchi organ vakillari yangi mexanizmlar davlat xavfsizligini ta’minlash hamda xorijdan turib mamlakat barqarorligiga tahdid solayotgan shaxslarga nisbatan samarali chora ko‘rish maqsadida ishlab chiqilganini bildirdi.
Mol mulkni musodara qilish faqatgina sud organlarining rasmiy qarorlari va tegishli tergov harakatlari yakunlari asosida amalga oshirilishi belgilangan. Huquqshunoslarning qayd etishicha, mazkur cheklovlar xorijga ko‘chib ketgan va o‘z chiqishlarida amaldagi davlat siyosatiga qarshi faol harakat qilayotgan Rossiya fuqarolarining iqtisodiy aktivlariga jiddiy ta’sir ko‘rsatadi.
