10-aprel kuni Rossiyada Telegram messenjerining bloklanish darajasi rekord darajaga yetdi va ulanish imkoniyati 5-6 foizgacha pasaydi. Hozirda ushbu tarmoq mamlakatda WhatsApp va Signal kabi ilovalardan ko‘ra qattiqroq cheklanmoqda.
Rossiyada Telegram messenjeri faoliyatida 10-apreldan boshlab jiddiy muammolar kuzatilmoqda. OONI tadqiqot loyihasi ma’lumotlariga ko‘ra, tarmoqning ochiqlik darajasi bir sutka ichida 25 foizdan 5-6 foizgacha tushib ketgan. Bu esa messenjerdan maxsus chetlab o‘tish vositalarisiz (VPN yoki proksi) foydalanish deyarli imkonsiz ekanini anglatadi.
Messenjer ishining cheklanishi bo‘yicha eng ko‘p shikoyatlar Moskva va Sankt-Peterburg kabi yirik shaharlardan tushmoqda. Mutaxassislarning qayd etishicha, ayni damda Telegram Rossiyada boshqa barcha aloqa vositalariga qaraganda qattiqroq bloklanmoqda. Avvalroq hukumat messenjerni 1-apreldan butunlay to‘sib qo‘yishni rejalashtirayotgani haqida xabarlar tarqalgan edi.
Mavjud vaziyatda VPN va proksi-serverlar yagona yechim bo‘lib qolmoqda. Telegram’ning so‘nggi yangilanishi proksi-serverlar bilan ishlash tizimini sezilarli darajada yaxshilagan, bu esa foydalanuvchilarga blokirovkalarni osonroq chetlab o‘tish imkonini beradi. Ekspertlar aloqa uzilib qolmasligi uchun messenjer sozlamalarida proksi-serverlarni oldindan saqlab qo‘yishni tavsiya qilmoqdalar.
Izohlar
Hozircha izohlar yo‘q