Rossiya Donbassdagi hujumlar sekinlashgani sababli Lukashenkodan Belarus hududini urush zonasi qilishni va NATOga qarshi gibrid hujumlar yo‘llashni talab qilmoqda.
The Wall Street Journal nashrining yozishicha, Kreml qo‘shni davlatdan NATO mamlakatlariga qarshi ommaviy dron hujumlari va gibrid operatsiyalar uyushtirishda foydalanish imkoniyatlarini ko‘rib chiqmoqda. Ushbu yo‘nalishdagi faol harakatlar Belarusga nisbatan 2026-yildan beri amalga oshirilayotgani ma’lum bo‘ldi.
WSJ tahliliga ko‘ra, Rossiyaning Donbassdagi hujumi sekinlashgani sababli Kreml vaziyatni keskinlashtirishning xavfli yo‘llarini izlamoqda va Putinga yangi keskinlik nuqtalari zarur bo‘lib turibdi. AQSh va Yevropa rasmiylari Rossiyaning Belarus hududidan ko‘zlagan asosiy maqsadlarini quyidagicha baholamoqda: Ukraina obyektlariga doimiy ravishda dronlar uchirish, front chizig‘ini Ukrainaning g‘arbiy viloyatlari tomon kengaytirish, Ukraina Qurolli Kuchlari zaxiralarini sharqdagi muhim hududlardan uzoqlashtirish hamda Belarusdan qo‘shni NATO mamlakatlariga qarshi provokatsiyalar uchun foydalanish. Moskva shu orqali Ukrainani qo‘llab-quvvatlash tizimiga putur yetkazishni va NATOning reaksiyasini tekshirib ko‘rishni istamoqda.
Moskva Lukashenkoga ta’sir o‘tkazish uchun ko‘plab vositalarga ega bo‘lib, ulardan eng asosiysi pul hisoblanadi. Razvedkaning sobiq xodimlari Kreml “moliyaviy bo‘g‘ish” usulidan foydalanayotganini tasdiqlashgan. Rossiya tomonidan aksariyat muzokaralarni elchi Boris Grizlov olib bormoqda va u Lukashenko bilan bevosita aloqada. Moskva moliyaviy yordamni butunlay to‘xtatish bilan tahdid qilishi mumkin, Belarus iqtisodiyoti esa ushbu mablag‘larga butunlay bog‘lanib qolgan.
