Shvetsariya bilan durang o‘yinda Qatar termasiga Jahon chempionatlari tarixidagi ilk ochkoni keltirgan gol muallifi Bualem Xuhi 3 mln dollar va Rolls-Royce bilan taqdirlanadi
Shimoliy Amerikada bo‘lib o‘tayotgan Jahon chempionatining guruh bosqichi doirasida Shvetsariya va Qatar terma jamoalari o‘rtasidagi uchrashuv 1:1 hisobidagi durang bilan yakunlandi. Ushbu o‘yinda Qatar termasiga o‘z tarixidagi ilk ochkoni taqdim etgan gol muallifi Bualem Xuhi misli ko‘rilmagan mukofot bilan taqdirlanadi. Bu haqda Chiris Sports nashri xabar berdi.
Ma’lum qilinishicha, tarixiy gol evolyutsiyasi uchun futbolchiga 3 million AQSh dollari miqdoridagi mukofot puli hamda qiymati taxminan 550 ming dollarga teng bo‘lgan Rolls-Royce Phantom avtomobili taqdim etiladi.
Uchrashuv ssenariysi o‘ta dramatik kechdi. Dastlab, 17-daqiqada Shvetsariya hujumchisi Brel Embolo penaltini aniq amalga oshirib, jamoasini oldinga olib chiqdi. Mazkur penalti ushbu mundialda belgilangan dastlabki 11 metrlik jarima zarbasi sifatida qayd etildi. Qatar termasining javob goli esa hakam tomonidan qo‘shib berilgan 90+4-daqiqada Bualem Xuhi tomonidan kiritilib, jamoaga tarixiy durangni taqdim etdi.
Ma’lumot o‘rnida, AQSh, Kanada va Meksika mezbonlik qilayotgan mazkur Jahon chempionati 19-iyulga qadar davom etadi. Turnir tarixida ilk bor 48 ta terma jamoa 12 ta guruhga bo‘lingan holda ishtirok etmoqda. Pley-off bosqichiga har bir guruhning eng yaxshi ikkita jamoasi hamda uchinchi o‘rinni egallagan 8 ta eng yaxshi terma jamoa yo‘llanma oladi.
