DXX va Departament xodimlari OIV bilan kasallangan shaxsga ijobiy ekspertiza xulosasini rasmiylashtirib berish evaziga 3 ming dollar pora olgan OITS markazi laboranti va ekspertni qo‘lga oldi.
Qashqadaryo viloyatida DXX va Bosh prokuratura huzuridagi Departament xodimlari hamkorligida o‘tkazilgan tezkor tadbirda noqonuniy daromad orttirmoqchi bo‘lgan tibbiyot xodimlari ushlandi.
Surishtiruvlarga ko‘ra, Qashqadaryo viloyat OITSga qarshi kurash markazining OIV diagnostikasi laboratoriyasi laboranti OIV bilan kasallangan 30 yoshli fuqaroga nisbatan tayinlangan ekspertiza xulosasini tanish mansabdor shaxslar orqali uning foydasiga hal qilib, ijobiy diagnostika xulosasini taqdim etishni va’da qilgan. Ushbu “xizmat” evaziga u fuqarodan 3 ming AQSh dollari talab qilgan.
Tezkor amaliyotning davomida ushbu noqonuniy sxemaga aloqador bo‘lgan Respublikasi sud-tibbiy ekspertiza ilmiy-amaliy markazining tuman bo‘limi boshlig‘i ham kelishilgan puldan 2,5 ming AQSh dollarini olayotgan vaqtida ashyoviy dalillar bilan qo‘lga olindi.
Hozirda mazkur holat yuzasidan tegishli moddalar bilan jinoyat ishi qo‘zg‘atilib, dastlabki tergov harakatlari olib borilmoqda.
Izohlar
Hozircha izohlar yo‘q