Qashqadaryo viloyatida keliniga uzluksiz jismoniy va ruhiy tazyiq o‘tkazib, uni o‘zini o‘ldirish darajasiga yetkazgan 47 yoshli qaynonaga sud hukmi o‘qildi. U 5 yil muddatga ozodlikdan mahrum etildi.
Bu haqda «Millar» ko‘rsatuvida ma’lum qilindi. Ish materiallariga ko‘ra, sudlanuvchi uch yil davomida kelinini ro‘zg‘or ishlarini uddalay olmaslikda ayblab, uni doimiy ravishda kaltaklagan, uydan haydab chiqargan hamda unga ruhiy tazyiq o‘tkazib kelgan.
Shuningdek, qaynona kelinining ota-onasi bilan muloqot qilishini cheklagan va telefondan foydalanishni taqiqlab qo‘ygan. Davomiy jismoniy va ruhiy qiynoqlarga bardosh bera olmagan kelin 2025-yilning 2-oktyabr kuni xonadon hovlisidagi molxonada o‘z joniga qasd qilgan.
Jinoyat ishlari bo‘yicha Chiroqchi tuman sudi 47 yoshli ayolni O‘zbekiston Respublikasi Jinoyat kodeksining 103-moddasi 2-qismi «a» bandi (Moddiy tomondan yoki boshqa jihatdan aybdorga qaram bo‘lgan shaxsni o‘zini o‘ldirish darajasiga yetkazish) bo‘yicha aybdor deb topdi. Sud hukmi bilan unga 5 yil muddatga ozodlikdan mahrum qilish jazosi tayinlandi.
