Gonkongda o‘tgan xokkey bo‘yicha jahon chempionati bahslarida O‘zbekiston vakillari mutlaq g‘alaba qayd etdi. Terma jamoamiz raqiblar darvozasiga jami 97 ta shayba kiritib, rekord o‘rnatdi.
O‘zbekiston milliy terma jamoasi Gonkongda o‘tkazilgan uchinchi divizion (B guruhi) jahon chempionatida mislsiz natija qayd etib, guruh g‘olibiga aylandi. Xokkeychilarimiz beshta o‘yinning barchasida zafar quchib, o‘z guruhida birinchi o‘rinni egalladi va kelgusi mavsum uchun A guruhiga yo‘llanmani qo‘lga kiritdi. Hal qiluvchi bahsda turnir mezbonlari 9:4 hisobida taslim etildi. Turnir davomida hamyurtlarimiz Mo‘g‘uliston, Filippin, KXDR va Lyuksemburg jamoalari ustidan yirik g‘alabalarga erishib, raqiblar darvozasini jami 97 marotaba ishg‘ol qilishdi.
Normund Seyeyis boshchiligidagi jamoaning ushbu muvaffaqiyati mamlakat xokkeyidagi o‘sish sur’atlarini yana bir bor tasdiqladi. Tarkibning asosiy qismini «Humo» va «Binokor» klublari a’zolari tashkil etgan bo‘lsa, rossiyalik legioner Pavel Sinyavskiy ham g‘alabaga munosib hissa qo‘shdi. Endi terma jamoamiz uchinchi divizionning kuchliroq hisoblangan A guruhida Meksika, Tayvan, Janubiy Afrika Respublikasi kabi jamoalar bilan to‘qnash keladi va ikkinchi divizionga chiqish uchun kurashni davom ettiradi.
Izohlar
Hozircha izohlar yo‘q