Bangkokda o‘tgan kikboksing bo‘yicha Jahon kubogida O‘zbekiston terma jamoasi 36 ta oltin medalni qo‘lga kiritdi. Mamlakatimiz vakillari umumjamoa hisobida faxrli ikkinchi o‘rinni egalladi.
7-12-aprel kunlari Bangkok shahrida o‘tkazilgan kikboksing bo‘yicha Jahon kubogi O‘zbekiston terma jamoasi uchun g‘alabalar seriyasiga boy bo‘ldi. Dunyoning 32 mamlakatidan kelgan 1000 nafardan ortiq sportchi ishtirok etgan nufuzli turnirda hamyurtlarimiz o‘zlarining ustunliklarini namoyish etishdi. Yakuniy natijalarga ko‘ra, o‘zbekistonlik jangchilar jami 72 ta medalni qo‘lga kiritib, katta muvaffaqiyatga erishdilar.
Terma jamoamiz xazinasidan 36 ta oltin, 22 ta kumush va 14 ta bronza medali joy oldi. Bunday yuksak ko‘rsatkich O‘zbekistonga umumjamoa hisobida dunyo bo‘yicha ikkinchi o‘rinni egallash imkonini berdi. Musobaqa mezboni Tailand birinchi o‘rinni band etgan bo‘lsa, kuchli uchlikni Vetnam termasi yakunlab berdi. Sportchilarimizning ushbu muvaffaqiyati mamlakatda kikboksing maktabi yangi bosqichga chiqqanidan dalolat beradi.
