Toshkentning Yashnobod tumanida Zeekr 001 rusumli elektromobilda yong‘in yuz berdi. Guvohlarning so‘zlariga ko‘ra, portlash ovozidan so‘ng mashina yonishni boshlagan, hodisada jabrlanganlar yo‘q.
26-avgust kuni soat 14:40 atrofida Toshkent shahrining Yashnobod tumanida Zeekr 001 rusumli elektromobilda yong‘in chiqdi.
Guvohlarning ta’kidlashicha, avtomobildan dastlab portlash ovozi eshitilgan, shundan so‘ng olov tez fursatda mashina kuzovini qoplab olgan. Yong‘in oqibatida halok bo‘lganlar va jabrlanganlar yo‘q.
Ayni vaqtda voqea joyiga FVV yong‘in-qutqaruv ekipajlari yetib kelib, yong‘inni bartaraf etish choralarini ko‘rgan. Elektromobilning yonib ketishi sabablari va moddiy zarar miqdori mutaxassislar tomonidan o‘rganilmoqda.
