O‘zbekistonda 2026-yilning 6 oyi davomida xizmat burchini ado etish chog‘ida 18 nafar ichki ishlar xodimi vafot etdi, 78 nafari jarohatlandi. Halok bo‘lganlar soni o‘tgan yilgiga nisbatan 3 baravar ko‘paygan.
Uning qayd etishicha, 2026-yilning o‘tgan 6 oyi mobaynida 18 nafar ichki ishlar organi xodimi o‘z xizmat vazifasini bajarish jarayonida vafot etgan. Shuningdek, 78 nafar ichki ishlar organi xodimi xizmat vazifasini bajarish chog‘ida turli darajada tan jarohati olgan. Vazirlik rahbariyati nomidan halok bo‘lgan xodimlarning oila a’zolari va yaqinlariga chuqur hamdardlik bildirildi.
Ma’lumot uchun, 2025-yilda xizmat vazifasini bajarish chog‘ida 6 nafar xodim vafot etib, 131 nafari jarohatlangani ma’lum qilingan edi. Amaldagi ko‘rsatkichlar shuni ko‘rsatadiki, halok bo‘lgan xodimlar soni joriy yilning atigi 6 oyida o‘tgan yilgi umumiy ko‘rsatkichga nisbatan 3 baravarga oshgan.
Eslatib o‘tamiz, joriy yilning 25-fevral kuni tungi xizmat vaqtida Toshkentning Mirobod tumani Nukus ko‘chasida transport vositasini olib qochib, yuqori tezlikda harakatlangan voyaga yetmagan shaxs YPX inspektori Hosilbek Eshnazarovni urib yuborgan edi. Inspektor uch kun davomida ko‘rsatilgan tibbiy yordamga qaramay, 27-fevral kuni shifoxonada vafot etgan.
Izohlar
Hozircha izohlar yo‘q