Olmaotada Qozog‘istondagi birinchi ekologik toza krematoriy ish boshladi. Mazkur majmua ikki kamerali kuydirish texnologiyasi bilan jihozlangan bo‘lib, undagi ko‘p bosqichli tozalash tizimi atrof-muhitga zararli moddalar, tutun yoki noxush hidlar tarqalishining oldini oladi.
Jarayonning o‘rtacha davomiyligi taxminan ikki soatni tashkil etadi va uskunalar to‘liq quvvat bilan ishlaganda har bir pech sutkasiga sakkiztagacha amaliyotni bajarish imkoniyatiga ega. Ta’kidlash joizki, pechlarni zarur haroratgacha qizdirish va ishga tayyorlash jarayoni 35 soatgacha vaqt talab etadi. Krematsiya jarayoni qat’iy tartibga solingan bo‘lib, u hujjatlarni qabul qilish, shaxsni aniqlash va jarayon yakunida xokni yaqinlariga topshirish kabi bosqichlarni o‘z ichiga oladi. Shuningdek, majmuada marhum bilan vidolashuv zallari hamda jarayonni maxsus xonadan kuzatish imkoniyati yaratilgan. Qozog‘istonda shunday yangiliklar joriy etilayotgan bir paytda,
O‘zbekistonda ham sohani raqamlashtirish bo‘yicha muhim qadam qo‘yildi: joriy yilning 1-martidan boshlab mamlakatda o‘lim haqidagi ma’lumotnomalarni QR-kodli elektron shaklda rasmiylashtirish tizimi joriy etildi va bu hujjatlar Yagona interaktiv davlat xizmatlari portalidagi shaxsiy kabinetlar orqali avtomatik tarzda taqdim etilmoqda.
