O‘zgidromet 13-17-iyul kunlari +46 darajagacha anomal issiq bo‘lishi e’lon qildi. Hududda termik depressiya, shamolning 18 m/s gacha kuchayishi, chang-to‘zonlar kutilmoqda.
O‘zbekiston Gidrometeorologiya xizmati agentligi (O‘zgidromet) kelgusi haftaning ish kunlari, ya’ni 13-17-iyul kunlari uchun shoshilinch shtorm ogohlantirish xabarini e’lon qildi. Sinoptiklarning ma’lum qilishicha, hududga janubdan juda issiq havo oqimi kirib kelmoqda va ushbu oqim termik depressiya (termal tushkunlik) bosqichiga o‘tmoqda. Shu sababli respublikaning barcha tarmoqlari anomal issiqning salbiy oqibatlarini kamaytirish choralarini ko‘rishi shart.
Unga ko‘ra, belgilangan kunlarda respublika hududining katta qismida havo harorati kutilayotgan darajadan ancha yuqori bo‘ladi. Kunduzgi kunlarda havo haroratining maksimumlari +41…+43 darajagacha ko‘tariladi. Respublikaning shimoli, janubi va cho‘l hududlarida esa jazirama yanada kuchayib, havo harorati +44…+46 darajagacha issiq bo‘lishi kutilmoqda.
Anomal issiq to‘lqini shamol kuchayishi bilan ham kuzatiladi. Respublika bo‘ylab ba’zi joylarda shamol tezligi 13–18 m/s gacha kuchayishi, ayrim tumanlarda esa chang-to‘zonlar ko‘tarilishi kutilmoqda.
Mutaxassislar ushbu issiqlik to‘lqini keltirib chiqaradigan termik depressiya holatida barcha sohalar, ayniqsa, kommunal, energetika va sog‘liqni saqlash tizimlari o‘z ish rejimini ushbu ob-havo sharoitiga moslashtirishi va salbiy oqibatlarni kamaytirishi zarurligini ta’kidlamoqda.
Izohlar
Hozircha izohlar yo‘q