BMT hisobotiga ko‘ra, mamlakatda suv stressi 120 foizdan oshib ketgan. Bu tabiiy resurslarning tiklanishidan ko‘ra ko‘proq suv ishlatilayotganini anglatadi. Shu bilan birga, «yashil» energiya uchun investitsiyalar hajmi ortmoqda.
O‘zbekiston Markaziy Osiyodagi suv tanqisligi eng og‘ir darajada bo‘lgan davlatlar qatoriga kirdi. BMT Yevropa iqtisodiy komissiyasi e’lon qilgan hisobotda mamlakatdagi suv stressi ko‘rsatkichi 120 foizdan oshgani qayd etilgan. Bu shuni anglatadiki, respublika har yili tabiat tiklay oladigan miqdordan ancha ko‘p suv sarflamoqda. Asosiy suv zaxiralari qishloq xo‘jaligiga yo‘naltirilmoqda, biroq muzliklarning erishi va aholi sonining o‘sishi sug‘orish tizimlariga bosimni yanada kuchaytirmoqda.
Vaziyat faqat suv bilan cheklanib qolmayapti: mintaqada havoning ifloslanishi ham JSST me’yorlaridan uch baravar yuqori ekani aniqlangan. Shunga qaramay, O‘zbekiston ushbu ekologik tahdidlarga qarshi faol kurash boshlagan. Xususan, 2024-yilning o‘zida toza energiya loyihalariga 3 milliard dollarga yaqin sarmoya kiritildi. Bu Markaziy Osiyo mintaqasidagi «yashil» o‘tish jarayonidagi eng yuqori ko‘rsatkichlardan biri bo‘lib, kelajakda iqlim o‘zgarishi oqibatlarini yumshatishga xizmat qiladi.
