O‘zbekistonda «Rieltorlik faoliyati to‘g‘risida»gi qonunning yangi tahriri qabul qilindi. 7-noyabrdan kuchga kiradigan qoidaga ko‘ra, rieltorlar maxsus imtihon topshirib, sertifikat olishlari shart.
O‘zbekistonda «Rieltorlik faoliyati to‘g‘risida»gi qonun yangi tahrirda qabul qilindi hamda u 2026-yilning 7-noyabr kuni rasman kuchga kiradi. Yangi hujjat ko‘chmas mulk bozorida faoliyat yuritayotgan mutassislar va agentliklar uchun qator qat’iy talablarni joriy etadi. Davlat aktivlarini boshqarish agentligi (DABA) rieltorlik sohasi bo‘yicha vakolatli davlat organi etib belgilandi.
Qonunchilikdagi asosiy o‘zgartirishlarga ko‘ra, endilikda rieltorlar va ko‘chmas mulk agentlari majburiy tartibda maxsus o‘quv kurslarini o‘tashlari, imtihon topshirishlari hamda malaka sertifikatiga ega bo‘lishlari shart. Ushbu sertifikatlar professional jamoat birlashmalari tomonidan beriladi. Hozirda bozorda ishlayotgan ko‘plab mutaxassislar kasbiy ta’limga ega emasligi hamda faqat e’lon joylashtirish va vositachilik haqi olish bilan cheklanib qolayotgani sababli, yangi tartib sohadagi malakasiz shaxslar faoliyatini cheklaydi.
Rieltorlik tashkilotlari hamda agentlar faqat Yagona reyestrga kiritilgan sanadan e’tiboran rasman ish olib borish huquqiga ega bo‘lishadi. Ushbu reyestrda rieltorlar, agentliklar hamda ularning faoliyati haqida barcha ma’lumotlar ochiq joylashtiriladi.
Qonunda rieltorlik xizmatlarining asosiy turlari ham aniq belgilab berildi: ko‘chmas mulk va unga bo‘lgan huquqlar bo‘yicha bitimlar tuzishda vositachilik qilish, ko‘chmas mulk ob’yektlari va huquqlari savdosini tashkil etish, ko‘chmas mulk ob’yektlarini ishonchli boshqarish hamda ko‘chmas mulk bozorida axborot, konsalting va reklama xizmatlarini ko‘rsatish.
Bundan tashqari, shoshilinch shartnomalar bo‘yicha xizmatlar ko‘rsatishni tartibga soluvchi yangi «Yagona darcha» tizimi yaratilishi ko‘zda tutilgan.
Izohlar
Hozircha izohlar yo‘q