Prezident Shavkat Mirziyoyev pensiya tizimini isloh qilish bo‘yicha takliflar bilan tanishdi. Ish haqi va stajni hisoblashning geopolitical yangi qoidalari tufayli nafaqalar 8 foizgacha oshishi kutilmoqda.
Prezident Shavkat Mirziyoyev pensiya miqdorini hisoblash tartibini takomillashtirish bo‘yicha taqdim etilgan takliflar bilan tanishdi. Bu haqda davlat rahbari matbuot xizmati xabar berdi.
Amaldagi tartibga ko‘ra, pensiya miqdori oxirgi o‘n yillik mehnat faoliyatidagi istalgan ketma-ket besh yil uchun olingan ish haqidan kelib chiqib hisoblanadi. Bundan tashqari, hisob-kitobda oylik ish haqining 6 million so‘mdan ortiq bo‘lgan qismi inobatga olinmaydi. Bu qoida ayrim hollarda fuqarolarning o‘rtacha pensiya miqdori pasayishiga olib kelmoqda.
Shu sababli mas’ullar pensiya hisoblashda inobatga olinadigan ish haqi davrini 5 yildan 20 yilga uzaytirishni hamda kam daromadli alohida davrlarni hisob-kitobdan chiqarib tashlashni taklif qilmoqda. Shuningdek, 2027-yildan boshlab hisobga olinadigan ish haqining yuqori chegarasini amaldagi 6 million so‘mdan 6,6 million so‘mga oshirish ko‘zda tutilgan. Yangi tartib yangi nafaqaga chiquvchi fuqarolarning pensiya miqdorini o‘rtacha 8 foizga oshirishi mumkin.
Davlat rahbarining topshiriqlari: Shavkat Mirziyoyev pensiya tizimidagi o‘zgarishlar millionlab insonlar hayotiga daxldor ekanini aytib, har bir taklifning ijtimoiy-iatisodiy samarasini puxta hisoblash zarurligini bildirdi. Mutasaddilarga ushbu masalalarni aholi va OAV ishtirokida ochiq muhokama qilish hamda xorijiy tajriba asosida xususiy va korporativ pensiya tizimlarini yaratish bo‘yicha qonun loyihasini ishlab chiqish topshirildi.
Ta’kidlash joizki, prezident matbuot xizmati xabarida pensiya yoshini oshirishga oid takliflar tilga olinmagan.
Eslatib o‘tamiz, mamlakatda joriy yilning 1-iyulidan boshlab pensiya va nafaqalar miqdori oshirilgan edi.
Izohlar
Hozircha izohlar yo‘q