O‘zbekistonda olti oy ichida 111 kishi suvga cho‘kib halok bo‘ldi

O‘zbekistonda 2026-yilning birinchi yarmida 111 kishi suvda cho‘kib vafot etdi. Sport vazirligi tarmoqlardagi e’tirozlar ortidan basseynlar yetishmovchiligi masalasiga munosabat bildirdi.

O‘zbekistonda suvda cho‘kib vafot etish holatlari, ayniqsa, o‘smirlar va yosh bolalar bilan bog‘liq fojialar jamoatchilik hamda ijtimoiy tarmoqlarda keskin muhokamalarga sabab bo‘lmoqda. Favqulodda vaziyatlar vazirligi ma’lumotlariga ko‘ra, 2026-yilning o‘tgan olti oyi davomida 111 nafar shaxs suvda cho‘kib vafot etgan.

Ayniqsa Jizzaxda 3 nafar voyaga yetmagan qiz, Zarafshon daryosida 3 kishi, Surxondaryoda 3 nafar 18 yoshli yigit hamda Samarqandda 4 nafar bolaning cho‘kib ketgani jamoatchilikni larzaga soldi.

Tarmoq faollari hududlarda, ayniqsa qishloqlarda xavfsiz va arzon suv sporti inshootlari (basseynlar) yetishmasligi sababli bolalar xavfli oqar suvlarda va taqiqlangan havzalarda cho‘milishga majbur bo‘layotganini ta’kidlamoqda.

Sport vazirligi va mutasaddilar javobi

Aholi e’tirozlari ortidan Sport vazirligi vaziyatga munosabat bildirdi. Vazirlik tizimida 165 ta suzish havzasi (shundan 39 tasi ochiq) mavjud:

• Toshkent shahrida — 22 ta

• Andijon, Toshkent va Farg‘ona viloyatlarida — 16 tadan

• Samarqandda — 13 ta, Qashqadaryoda — 12 ta, Namanganda — 11 ta

• Qoraqalpog‘iston va Xorazmda — 9 tadan, Buxoro va Surxondaryoda — 8 tadan

• Sirdaryoda — 7 ta, Jizzax va Navoiyda — 6 tadan

• Respublika tashkilotlarida — 6 ta hamda xususiy sektorda 100 dan ortiq basseyn bor.

Vazirlik aholi va bolalar qamrovini kengaytirish zarurati borligini tan oldi. 2025–2027-yillarga mo‘ljallangan dasturga ko‘ra, Nukus, Andijon, Buxoro, Qarshi, Namangan, Termiz, Farg‘ona va Urganchdagi suzish havzalari mukammal ta’mirlanadi va yangilari barpo etiladi. Shuningdek, 2023–2026-yillarda davlat-xususiy sheriklik asosida 30 ga yaqin zamonaviy basseyn foydalanishga topshirildi.

Toshkent shahar hokimligi ham o‘z navbatida poytaxtda cho‘milish va dam olish maskani sifatida faoliyat yurituvchi 12 ta yangi suv havzasi bunyod etilishini ma’lum qildi.