O‘zbekistonda o‘quvchilarni haqorat qilgan va kaltaklagan pedagoglar bir yilga dars berishdan mahrum etiladi. MJtKga kiritilgan qo‘shimchalarga ko‘ra, o‘quvchilarga nisbatan ruhiy va jismoniy zo‘ravonlik qilgan o‘qituvchilarga 2,2 mln so‘mgacha jarima hamda bir yillik taqiq solinadi.
O‘zbekistonda bolalarga ta’lim va tarbiya berish jarayonida ularga nisbatan jismoniy yoki ruhiy ta’sir o‘tkazgan pedagoglar uchun ma’muriy javobgarlik rasman belgilandi. Bu haqda BMTning Bolalar jamg‘armasi (YUNISEF) O‘zbekistondagi vakolatxonasi xabar berdi.
Ma’muriy javobgarlik to‘g‘risidagi kodeksga (MJtK) kiritilgan qo‘shimchalarga muvofiq, ta’lim muassasalarida o‘quvchilarni haqoratlash, kamsitish, ruhiy bosim o‘tkazish va jismoniy jarohat yetkazish holatlari, agar ular Jinoyat kodeksi moddalariga tushmasa, ma’muriy huquqbuzarlik deb baholanadi.
Jarima miqdori va kasbiy taqiqlar
Bolalarga nisbatan zo‘ravonlik qilgani uchun jazolangan shaxslarga moliyaviy va kasbiy cheklovlar qo‘llaniladi.
Qoidabuzarlik uchun BHMning 1 baravaridan 5 baravarigacha (440 ming so‘mdan 2,2 million so‘mgacha) miqdorda jarima undiriladi. Bunga qo‘shimcha ravishda, javobgarlikka tortilgan pedagoglar bir yil muddatga ta’lim sohasida faoliyat yuritish huquqidan mahrum qilinadi.
Ushbu taqiq maktabgacha ta’lim tashkilotlari, umumta’lim maktablari, litsey va kollejlar, kasb-hunar maktablari hamda bolalar uchun mo‘ljallangan barcha turdagi qo‘shimcha ta’lim markazlariga tatbiq etiladi.
