Prezident qarori bilan ko‘chmas mulkka bo‘lgan huquqlarni o‘z vaqtida ro‘yxatdan o‘tkazmaganlik uchun ma’muriy jarimalar bekor qilindi. Shuningdek, meros uylarni soliqsiz sotish soddalashtirildi va garovdagi uylarga propiska qo‘yishga ruxsat berildi.
Ko‘chmas mulkka bo‘lgan huquqini o‘z vaqtida ro‘yxatdan o‘tkazmagan fuqarolar endi ma’muriy javobgarlikka tortilmaydi (jarimaga tortilmaydi). Buning o‘rniga muddati o‘tkazib yuborilgan vaqtga qarab hisoblanadigan oshirilgan miqdordagi davlat boji undiriladi.
Yaqin qarindoshdan meros yoki hadya sifatida olingan uyni daromad solig‘isiz sotish soddalashtirildi. Soliqdan ozod qilish uchun zarur bo‘lgan egalik qilish muddati meros rasmiylashtirilgan vaqtdan emas, balki mulkning avvalgi egasi tomonidan ro‘yxatdan o‘tkazilgan sanadan boshlab hisoblanadi.
Fuqarolarga xatlovga olingan, taqiq qo‘yilgan yoki bankda garovda (ipotekada) turgan uy-joylarga ham doimiy ro‘yxatdan o‘tishga ruxsat berildi.
Bunday uy-joyga doimiy ro‘yxatga kirish faqat belgilangan tartib bo‘yicha hamda mulkdor, garovga oluvchi (bank) yoki vakolatli organning birinchi murojaatiga ko‘ra ushbu ro‘yxatni bekor qilishga oldindan rozilik berish sharti bilan amalga oshiriladi.
Izohlar
Hozircha izohlar yo‘q