O‘zgidromet xabariga ko‘ra, 18–20-iyul kunlari O‘zbekistonga janubdan o‘ta issiq havo kirib kelishi davom etadi. Janubiy viloyatlar va cho‘l hududlarida harorat rekord darajadagi +48 darajaga yetishi mumkin.
Joriy yilning 18–20-iyul kunlari O‘zbekiston hududiga janubdan juda issiq havo oqimi kirib kelishi davom etadi, deb xabar bermoqda Gidrometeorologiya xizmati agentligi (O‘zgidromet).
Ushbu kunlarda sinoptiklar joriy yoz mavsumining eng yuqori harorat ko‘rsatkichlarini prognoz qilmoqdalar:
-
Mamlakatning aksariyat hududlarida havo harorati +43…+45 darajagacha ko‘tariladi;
-
Respublikaning janubida hamda cho‘l zonalarida ba’zi joylarda harorat anomal darajada — +46…+48 darajagacha yetishi kutilmoqda.
Anomal issiq ob-havodan tashqari, respublika bo‘ylab shamol tezligi 13–18 m/s gacha kuchayishi kutilmoqda. Ayrim joylarda shamol shabadasi soniyasiga 20–22 metrgacha yetishi, buning oqibatida chang-to‘zonlar ko‘tarilishi taxmin qilinmoqda.
Eslatib o‘tamiz, mamlakatda kuzatilayotgan anomal issiq harorat sababli 16-iyuldan boshlab Toshkent viloyatidagi barcha davlat va xususiy bog‘chalar faoliyati vaqtincha to‘xtatildi. Energetika vazirligi esa elektr energiyasi iste’moli tarixiy rekordni yangilagani fonida aholidan chiroqni tejashni va konditsionerlarni 24 darajadan past bo‘lmagan haroratda ishlatishni so‘radi.
