O‘zbekistonda hayvonlarga nisbatan shafqatsizlik uchun jinoiy javobgarlik joriy etish talab qilinmoqda. Tegishli petitsiya qisqa vaqt ichida 4000 ga yaqin imzo to‘pladi.
O‘zbekistonda hayvonlarga nisbatan shafqatsiz munosabatda bo‘lganlik uchun qonunchilikni qayta ko‘rib chiqish va jazolarni og‘irlashtirish bo‘yicha jamoatchilik tashabbusi ilgari surildi. Bunga so‘nggi vaqtlarda respublikaning turli hududlarida uysiz qolgan mushuk va itlarga nisbatan ommaviy zahar berish va o‘ldirish holatlari ko‘paygani sabab bo‘lgan.
Hujjat mualliflarining ta’kidlashicha, hozirda aybdorlarga nisbatan qo‘llanilayotgan 10 sutkadan 15 sutkagacha bo‘lgan ma’muriy qamoq jazosi sodir etilgan qilmishning og‘irlik darajasiga mos kelmaydi va huquqbuzarlarni to‘xtatib qolmaydi. Shu bois, petitsiyada bunday jinoyatlarni ma’muriy javobgarlikdan jinoiy javobgarlik toifasiga o‘tkazish taklif etilmoqda.
Petitsiyada hayvonlarga nisbatan jazosiz qolayotgan shafqatsizlik butun jamiyatda tajovuzkorlikning ortishiga olib kelishi mumkinligi haqida ogohlantirilgan. Mualliflar himoyasiz mavjudotlarga nisbatan hamdardlikning yo‘qligi kelajakda insonlar xavfsizligiga ham tahdid solishi mumkinligini ko‘rsatuvchi tadqiqotlarga tayanmoqda. Jamoatchilik va OAV e’tiborini jalb qilish orqali faollar qat’iy choralar ko‘rilishiga va yangi jallodlik holatlarining oldini olishga umid qilmoqda.
