Sport vazirligi va O‘FA vakillari «Barselona» rahbariyati bilan Barca Academy loyihasini yo‘lga qo‘yish bo‘yicha muzokaralar o‘tkazdi. Uchrashuvda «La Masiya» metodikasi va murabbiylar malakasini oshirish masalalari muhokama qilindi.
Ushbu masala bo‘yicha onlayn-muzokaralarni sport vaziri Adham Ikramov o‘tkazdi. Uchrashuvda shuningdek quyidagilar ishtirok etdi:
-
O‘zbekiston futbol assotsiatsiyasi (O‘FA) birinchi vitse-prezidenti Ravshan Ermatov;
-
«Barselona» klubi rahbariyati vakili Sesar Martines;
-
Barca Innovation Hub bosh direktori Albert Mundet.
Tomonlar mamlakatda bolalar va o‘smirlar futbolini tizimli rivojlantirish, yosh o‘yinchilarni xalqaro standartlar darajasida tayyorlash hamda zamonaviy futbol metodologiyasini joriy etishga qaratilgan loyihani yo‘lga qo‘yish masalasini muhokama qildilar.
Muzokaralar davomida Kataloniya klubining ta’lim tizimi, «Barselona»ning mashhur «La Masiya» (La Masia) maktabi metodikasi, o‘zbekistonlik murabbiylar malakasini oshirish hamda iqtidorli yosh futbolchilarni saralab olish (seleksiya) tizimini yo‘lga qo‘yish masalalariga alohida e’tibor qaratildi.
Ma’lumot uchun, Markaziy Osiyodagi ilk rasmiy «Barsa akademiyasi» 2023-yilda Qirg‘izistonning Jalolobod shahrida o‘z faoliyatini boshlagan edi. Hozirda qo‘shni davlatda ikkinchi akademiyani Bishkek shahrida tashkil etish bo‘yicha ham ishlar olib borilmoqda.
