Anomal issiq ob-havo tufayli Temiryo‘lekspress ayrim yo‘nalishlarda poyezdlar tezligini cheklaydi. Ayrim poyezdlar manzilga kechikib kelishi mumkin.
Ushbu qaror yo‘lovchilar xavfsizligini ta’minlash, poyezdlar harakati ishonchliligini saqlash hamda jazirama issiqda temir yo‘l infratuzilmasining barqaror va xavfsiz ishlashini ta’minlash maqsadida qabul qilingan.
Tezlikning cheklanishi munosabati bilan ayrim poyezdlar o‘z manzillariga jadvalda ko‘rsatilgan vaqtdan kechikib kelishi mumkin. Kompaniya yo‘lovchilardan yuzaga kelishi mumkin bo‘lgan kechikishlarni to‘g‘ri tushunishlarini so‘rab, cheklovlar birinchi navbatda harakat xavfsizligini ta’minlash maqsadida joriy etilayotganini ta’kidladi.
Eslatib o‘tamiz, mamlakatda kuzatilayotgan ekstremal issiq va energetika tizimiga tushayotgan yuklamalar fonida bundan avval ham bir qator jiddiy cheklovlar joriy etilgan edi. Chunonchi, 16-iyuldan boshlab Toshkent viloyatida barcha davlat, xususiy va idoraviy bog‘chalar faoliyati vaqtincha to‘liq to‘xtatildi.
Shuningdek, Davlat mehnat inspeksiyasi ish beruvchilarga kunning eng issiq vaqtida, ya’ni soat 11:00 dan 16:00 gacha xodimlarning ochiq havoda ishlashini cheklash yoki to‘xtatishni tavsiya qildi. Ekologiya qo‘mitasi esa aholi va mas’ul tashkilotlarni anomal jazirama davrida daraxtlar va yashil maydonlarni asrash uchun qo‘shimcha sug‘orish choralarini ko‘rishga chaqirdi.
