O‘zbekiston futbol terma jamoasi FIFA reytingida 50-o‘ringa ko‘tarildi. Fabio Kannavaro boshqaruvidagi jamoa Osiyoda kuchli beshlikda qolmoqda.
Jamoamiz o‘z hisobidagi ballar miqdorini 1465,34 taga yetkazib, avvalgi 52-o‘rindan 50-pog‘onaga ko‘tarilishga muvaffaq bo‘ldi. Qiziqarli jihati shundaki, bu natijaga Venesuela bilan o‘tkazilgan va 0:0 hisobidagi durang bilan yakunlangan nazorat uchrashuvi orqali erishildi. Ushbu o‘yin jamoa hisobiga ramziy 0,03 reyting ballini qo‘shib qo‘ydi.
Osiyo mintaqasida O‘zbekiston futboli o‘z mavqeyini saqlab qolmoqda. Kannavaro boshchiligidagi jamoa qit’amizning gigantlari hisoblangan Yaponiya (18-o‘rin), Eron (21-o‘rin), Janubiy Koreya (25-o‘rin) va Avstraliyadan (27-o‘rin) keyingi beshinchi o‘rinni band etib turibdi. Kuchli elliktalikka kirish jamoaning jahon arenasidagi nufuzi ortib borayotganidan dalolat beradi.
Umumjahon reytingining cho‘qqisida esa jiddiy o‘zgarish yuz berdi. Ispaniya va Argentinani ortda qoldirgan Fransiya terma jamoasi peshqadamlikni qo‘lga kiritdi. Dunyoning eng kuchli o‘nta jamoasi safidan Angliya, Portugaliya, Braziliya, Niderlandiya, Marokash, Belgiya va Germaniya kabi futbol mamlakatlari joy olgan.
Izohlar
Hozircha izohlar yo‘q