O‘zbekiston milliy terma jamoasi JCHdagi tarixiy ilk o‘yinida Mexikodagi «Atsteka» stadionida Kolumbiyaga 1:3 hisobida yutqazdi. Tarixiy golimizni Abbosbek Fayzullayev urdi.
Futbol bo‘yicha O‘zbekiston milliy terma jamoasi Jahon chempionatlari tarixidagi o‘zining ilk uchrashuvini o‘tkazdi. «K» guruhi 1-turi doirasida Mexikodagi mashhur «Atsteka» stadionida bo‘lib o‘tgan bahsda vakillarimiz Kolumbiyaga 1:3 hisobida imkoniyatni boy berishdi.
Janubiy amerikaliklar 40-daqiqada Daniel Munyosning goli evaziga hisobni ochishdi. Tanaffusda hamyurtlarimiz chap qanotni kuchaytirish uchun ikkita o‘zgarishni amalga oshirishdi: Sherzod Nasrullayev va Oston O‘runov o‘rniga Farruh Sayfiyev hamda Dostonbek Hamdamov maydonga tushdi.
60-daqiqada quvonchli voqea yuz berdi: Abbosbek Fayzullayev O‘zbekiston terma jamoasining Jahon chempionatlari tarixidagi birinchi golini urdi. Yarim himoyachi darvozabon qaytargan to‘pga birinchi bo‘lib yetib keldi va uni boshi bilan darvozaga joyladi — 1:1.
Biroq 65-daqiqada sardor Eldor Shomurodovning markazdagi xatosidan so‘ng kolumbiyaliklar tezkor qarshi hujumga o‘tishdi va Luis Dias jamoasini yana oldinga olib chiqdi. O‘yin yakunida Xaminton Kampas boshi bilan zarba berib, yakuniy hisobni olingan qildi — 1:3. Hakam tomonidan qo‘shib berilgan daqiqalarda Behruz Karimovning uzoqdan yo‘llagan kuchli zarbasi darvoza to‘siniga tegib qaytdi.
Izohlar
Hozircha izohlar yo‘q