Bugun, 20-iyun kuni Germaniyaning Myunxen shahrida mudhish temiryo‘l halokati qayd etildi. Ikkita yuk poyezdining o‘zaro to‘qnashishi oqibatida bir nechta vagon relsdan chiqib, ko‘prikdan pastga qulab tushdi. Reuters agentligining xabar berishicha, ushbu og‘ir hodisa oqibatida bir kishi jiddiy jarohatlanib shifoxonada vafot etdi.
Myunxen huquq-tartibot idoralarining BILD nashriga ma’lum qilishicha, voqea tungi soat 01:40 atrofida Milbertshofen tumanidagi Shlaysxaymer shtrasse ko‘chasi ustidan o‘tgan temiryo‘l ko‘prigida yuz bergan. Ikki yuk tarkibi manyovr ishlarini bajarayotgan vaqtda to‘qnashuv kelib chiqqan va poyezdlardan birining bo‘sh vagonlari pastdagi avtomobil yo‘liga qulagan. Voqea joyida zudlik bilan politsiya, qutqaruvchilar va tibbiyot xodimlari ish boshladi.
Deutsche Bahn (Germaniya temiryo‘llari) vakilining tushuntirishicha, mazkur relslar faqat yuk poyezdlari harakati uchun mo‘ljallangan bo‘lib, yo‘lovchi poyezdlari qatnoviga ta’sir ko‘rsatmagan. Hozircha to‘qnashuvning aniq sabablari keltirilmagan, surishtiruv jarayonlari olib borilmoqda. Hozirda vagonlarni kranlar yordamida ko‘tarish va hududni tozalash ishlari ketmoqda. Ko‘prik ostidagi ko‘cha har ikki yo‘nalishda ham transportlar uchun yopilgan bo‘lib, tozalash ishlari 21-iyungacha davom etishi mumkin.
Izohlar
Hozircha izohlar yo‘q