Rossiya hududlariga jami 556 ta, xususan, Moskva viloyatiga 120 tadan ortiq dron hujum qildi. Qurbonlar bor, aeroportlar faoliyati cheklandi.
Rossiya Federatsiyasi Mudofaa vazirligining rasmiy hisobotiga tayanib xabar berilishicha, o‘tgan tun davomida mamlakat havo hududida samolyot turidagi 556 ta dron urib tushirilgan va zararsizlantirilgan. Asosiy zarbalar poytaxt hududi hamda chegaradosh viloyatlarga to‘g‘ri keldi. Xususan, Moskva shahriga yaqinlashish jarayonida havo hujumidan mudofaa vositalari tomonidan 120 tadan ziyod havo nishonlari yo‘q qilindi.
Moskva meri Sergey Sobyaninning ma’lum qilishicha, apparatlardan bir nechtasining bo‘laklari Moskva neftni qayta ishlash zavodi hududiga qulagan. Oqibatda korxona kirish joyi yaqinida bo‘lgan 12 nafar quruvchi tan jarohati olgan, biroq zavodning texnologik liniyasiga zarar yetmagan. Moskva viloyatining Ximki va Mitishchi shaharlaridagi turar joy binolariga dronlar to‘g‘ridan-to‘g‘ri kelib urilishi oqibatida 3 kishi halok bo‘ldi, hududda jarohatlanganlarning umumiy soni esa 18 nafarga yetdi. Hujum sababli poytaxt aviatsiya uzelida jiddiy cheklovlar joriy etildi. Domodedovo, Sheremetyevo, Vnukovo va Jukovskiy aeroportlarida havo hududi vaqtincha yopilishi oqibatida 51 ta yo‘lovchi samolyoti zaxira aerodromlariga yo‘naltirildi.
Shu bilan birga, Bryansk viloyatida 201 ta, Kursk viloyatida esa 88 ta dron yo‘q qilingani qayd etildi. Belgorod viloyatida FPV-dronining yuk mashinasiga to‘g‘ridan-to‘g‘ri zarba berishi natijasida haydovchi hayotdan ko‘z yumdi. Rostov-Don va Azov shaharlarida qurbonlar qayd etilmadi, biroq portlash to‘lqini oqibatida Don davlat texnika universiteti korpuslaridan birining oynalari sinib ketgan.
