O‘zbekiston Respublikasi Prezidenti Shavkat Mirziyoyev Belarus Respublikasi Prezidenti Aleksandr Lukashenkoning taklifiga binoan 8-iyul kuni ikki kunlik rasmiy tashrif bilan Minsk shahriga jo‘nab ketdi.
Belarus poytaxtida oliy darajadagi ikki tomonlama muzokaralar bo‘lib o‘tishi rejalashtirilgan. Davlat rahbarlari uchrashuv davomida O‘zbekiston va Belarus o‘rtasidagi ko‘p qirrali hamkorlik munosabatlarini yanada mustahkamlashning dolzarb masalalarini atroflicha ko‘rib chiqadilar.
Muzokaralar kun tartibidagi markaziy mavzular o‘zaro tovar ayirboshlash hajmini tubdan oshirish, sanoat kooperatsiyasini rivojlantirish hamda qishloq xo‘jaligi, mashinasozlik, farmatsevtika, yengil va oziq-ovqat sanoati sohalarida yangi qo‘shma loyihalarni amalga oshirishdan iborat bo‘ladi.
Minskdagi uchrashuvlar yakuni bo‘yicha ikki tomonlama hamkorlikka oid yigirmataga yaqin muhim hujjatlar paketi imzolanishi kutilmoqda. Ularning orasida eng asosiysi — O‘zbekiston va Belarus o‘rtasida Strategik sheriklik o‘rnatish to‘g‘risidagi deklaratsiya bo‘lib, u davlatlararo aloqalarni mutloqo yangi bosqichga olib chiqadi.
Davlat rahbarining tashrifi arafasida Minskda ikki mamlakat hududlari va yetakchi biznes vakillari ishtirokida uchinchi Hududlararo forum ham o‘z ishini boshladi.
Ekspertlarning qayd etishicha, so‘nggi 10 yilda mamlakatlar o‘rtasidagi tovar ayirboshlash hajmi 13 barobarga, xizmatlar ko‘rsatish esa 30 barobarga oshgan. 2025-yil yakunlariga ko‘ra o‘zaro savdo aylanmasi 855 million dollarni tashkil etgan bo‘lib, joriy yil yakunigacha bu ko‘rsatkichni 1 milliard dollardan oshirish, 2030-yilga borib esa 2 milliard dollarga yetkazish rejalashtirilgan.
Izohlar
Hozircha izohlar yo‘q