Shavkat Mirziyoyev Irakliy Kobaxidzening taklifiga binoan Tbilisiga jo‘nab ketdi. Oliy darajadagi uchrashuvda salmoqli hujjatlar to‘plami imzolanadi.
Avval xabar qilinganidek, Gruziya poytaxtida oliy darajadagi ikki tomonlama muzokaralar oʻtkaziladi. Oʻzbekiston – Gruziya doʻstlik va koʻp qirrali sheriklik munosabatlarini yanada rivojlantirish masalalari diqqat markazida boʻladi. Yetakchilar xalqaro va mintaqaviy ahamiyatga molik dolzarb mavzular yuzasidan ham fikr almashadi.
Sammit yakunlari boʻyicha hamkorlikning turli yoʻnalishlarini qamrab oladigan ikki tomonlama hujjatlarning salmoqli toʻplamini imzolash rejalashtirilgan. Tashrif dasturida madaniy-gumanitar tadbirlarda ishtirok etish ham koʻzda tutilgan.
Ikki davlat oʻrtasida diplomatik munosabatlar 1994-yil 19-avgust kuni oʻrnatilgan. Shundan buyon ikki tomonlama siyosiy muloqot izchil rivojlanib kelmoqda. 1995-yil sentyabrida oʻzaro munosabatlarning asosiy huquqiy hujjati hisoblangan Doʻstlik va hamkorlik toʻgʻrisidagi shartnoma imzolandi.
2025-yil 5-mart kuni Gruziya bosh vaziri Irakliy Kobaxidze boshchiligidagi delegatsiya Oʻzbekistonga rasmiy tashrif bilan kelgandi. Prezident bilan uchrashuvda savdo-iqtisodiyot, investitsiya, transport-logistika, turizm va madaniyat sohalaridagi oʻzaro manfaatli hamkorlikni kengaytirish masalalari koʻrib chiqilgandi.
Ikki mamlakat oʻrtasida erkin savdo rejimi amal qiladi. Bu esa tovar ayirboshlash hajmining muttasil oʻsishiga xizmat qilmoqda. Soʻnggi 5 yil ichida tovar ayirboshlash hajmi ikki yarim baravarga oshdi, qoʻshma korxonalar soni va yuk aylanmasi koʻpaydi. Mamlakatda gruziyalik investorlar ishtirokida tashkil etilgan raqamli bank faoliyat yuritmoqda.
