O‘zbekiston Prezidenti Toshkent xalqaro investitsiya forumi doirasida Jon Yovanovich va Ben Blekni qabul qildi. Uchrashuvda yangi xalqaro aeroport, data-markazlar va tibbiyot majmuasi qurish loyihalari muhokama qilindi.
O‘zbekiston Prezidenti Shavkat Mirziyoyev Toshkent xalqaro investitsiya forumi tadbirlari doirasida AQSH Eksport-import banki (Eksimbank) prezidenti va raisi Jon Yovanovich hamda AQSH Xalqaro moliyaviy taraqqiyot korporatsiyasi (DFC) bosh ijrochi direktori Ben Blek bilan uchrashuv o‘tkazdi. Yuqori martabali mehmonlar davlat rahbariga AQSH Prezidenti Donald Trampning salomi va ezgu tilaklarini yetkazishdi.
Muzokaralar davomida AQSH moliyaviy institutlarining O‘zbekistonda infratuzilmani rivojlantirish, muhim minerallarni o‘zlashtirish, energetika, sun’iy intellektni joriy etish hamda raqamlashtirish kabi yuqori texnologiyali strategik loyihalarni moliyalashtirishdagi ishtiroki atroflicha ko‘rib chiqildi.
Hamkorlikning asosiy yo‘nalishlari va yangi loyihalar
AQSH Eksimbanki bilan hamkorlik doirasida energetika tarmog‘ini modernizatsiya qilish bo‘yicha qo‘shma loyihalarni jadallashtirish yuzasidan kelishuvga erishildi. Shuningdek, mahalliy tadbirkorlarning ustuvor sohalardagi tashabbuslari uchun eksport kreditlarini taqdim etishni yanada rivojlantirishga alohida e’tibor qaratildi.
DFC korporatsiyasi bilan esa sog‘liqni saqlash sohasidagi loyihalarni qo‘llab-quvvatlash hamda energetika tarmog‘i va infratuzilmani modernizatsiya qilishga qaratilgan qo‘shma investitsiya platformasini ishga tushirish bo‘yicha tashabbuslar ma’qullandi.
Muzokaralarda quyidagi yirik infratuzilma loyihalarini amalga oshirishning amaliy bosqichiga o‘tish zarurligi alohida ta’kidlandi:
-
Toshkentda yangi xalqaro aeroportni qurish;
-
Farg‘ona viloyatida zamonaviy tibbiyot majmuasini tashkil etish;
-
Raqamli bankni ishga tushirish hamda data-markazlar va quruq portlarni barpo qilish.
Uchrashuv yakunida tomonlar muhokama qilingan barcha investitsiyaviy va texnologik loyihalarni izchil ilgari surish bo‘yicha qo‘shma “yo‘l xaritasi”ni qabul qilishga kelishib oldilar.
