Qirg‘izistondan kirib kelgan do‘l buluti Yangiqo‘rg‘on tumanida kuchli do‘l yog‘ishiga sabab bo‘ldi. Qishloq xo‘jaligi ekinlarini asrab qolish maqsadida O‘zgidromet xodimlari 18 ta «Alazan-6» raketasini qo‘lladi.
Yuzaga kelgan tabiiy hodisaning qishloq xo‘jaligi ekinlariga yetkazadigan salbiy ta’sirini kamaytirish va hosilni nobud bo‘lishdan asrab qolish maqsadida Yangiqo‘rg‘on gidrometeorologiya majmuasi mutaxassislari zudlik bilan atmosferadagi jarayonlarga faol ta’sir ko‘rsatish choralarini ko‘rdi.
Zararsizlantirish tadbirlari davomida havo bulutlariga qarata jami 18 ta «Alazan-6» rusumli maxsus raketalar otildi. Raketa zarbalari bir vaqtning o‘zida uchta texnologik qo‘mondonlik punktidan amalga oshirildi.
Xususan, 1-sonli punkt orqali Iskovot, Yangihayot va Hadikent yo‘nalishlariga 6 ta raketa uzatilgan bo‘lsa, 3-sonli punkt xodimlari Bog‘iston va O‘rtayalang‘och hududlari bo‘ylab yana 6 ta raketani qo‘lladi. Qolgan 6 ta raketa esa 4-sonli punktdan Bog‘iston, O‘rtayalang‘och va Hadikent yo‘nalishlaridagi bulut o‘choqlariga qarata otildi.
Amalga oshirilgan tezkor amaliyot do‘l zarrachalarining yiriklashishiga yo‘l qo‘ymay, ekin maydonlarini jiddiy talafotlardan saqlab qolish imkonini berdi.
