Maktabgacha va maktab ta’limi vazirligi barcha maktablarda milliy san’at yo‘nalishida to‘garaklar yo‘lga qo‘yilishini e’lon qildi. O‘quvchilarga haftasiga 2 soatdan saboq beriladi.
Maktabgacha va maktab ta’limi vazirining tegishli buyrug‘iga asosan tashkil etilayotgan mashg‘ulotlar o‘quvchilarga milliy san’at turlarini chuqurlashtirilgan holda o‘rgatishga qaratilgan.
Yangi tizimga ko‘ra, to‘garaklar to‘rtta asosiy yo‘nalish bo‘yicha faoliyat olib boradi: dutor chertish, doira chalish, tasviriy san’at hamda milliy raqs. Mashg‘ulotlar haftasiga 2 soatdan, o‘quv yili davomida jami 72 soat hajmida o‘tkazilishi belgilangan.
Vazirlik ma’lumotiga ko‘ra, to‘garaklarni tashkil etishdan ko‘zlangan asosiy maqsad milliy san’atni yoshlar orasida keng targ‘ib qilish va uni kelajak avlodga yetkazishdan iborat. Dastur doirasida iqtidorli o‘quvchilarni saralab olish uchun maxsus tanlovlar o‘tkazib boriladi.
Ma’lumot uchun, 2022-yilda mamlakatda har bir maktab bitiruvchisi kamida bitta milliy musiqiy cholg‘u qurolida chalishni bilishi bo‘yicha tizim joriy etish rejalashtirilgan edi.
Izohlar
Hozircha izohlar yo‘q