Prezident raisligidagi yig‘ilishda mahalla raislariga xususiy bog‘cha, maktab va klinikalar qurish uchun yerlarni auksionga chiqarish huquqi berilishi ma’lum qilindi. Shuningdek, mahallalarga 240 mlrd so‘m grant ajratiladi.
Bu haqda prezident Shavkat Mirziyoyev raisligida o‘tkazilgan va «mahalla yettiligi» faoliyatini isloh qilishga bag‘ishlangan videoselektor yig‘ilishida ma’lum qilindi. Yangi tartib investitsiyalarni jalb qilishni tezlashtirish va aholi ehtiyojlaridan kelib chiqib, joylarda ijtimoiy infratuzilmani qulayroq rivojlantirish imkonini beradi.
Yig‘ilishda «Yangi Quva» mahallasi misol qilib keltirildi. Ushbu mahallada o‘z bog‘chasi yo‘qligi sababli 50 nafar bola qo‘shni mahalladagi muassasaga qatnashga majbur, holbuki hududda 70 sotix bo‘sh yer maydoni mavjud. Endilikda raislar bunday muammolarni auksionlar orqali tezkor hal eta oladilar. Davlat rahbari joriy yilda infratuzilmani yaxshilash uchun tumanlarga o‘rtacha 250 mlrd so‘mdan, mahallalarga esa 5,5 mlrd so‘mdan mablag‘ berilganini eslatdi. Vakolatlar kengaygach, joylarda qoladigan qo‘shimcha daromadlar hajmi ikki baravarga oshgan bo‘lsa-da, ayrim rahbarlarda mas’uliyat va tashabbuskorlik yetishmayotgani tanqid qilindi.
Faoliyatda kamchiliklarga yo‘l qo‘ygani sababli yil boshidan buyon 152 nafar mahalla rahbari lavozimidan ozod etildi, yana 700 nafariga intizomiy jazo choralari ko‘rildi. Mahalladagi muammolarni tizimli hal etish, tozalikni saqlash va aholi daromadlarini oshirish loyihalari uchun «mahalla yettiligi»ga 10 million so‘mdan grantlar ajratiladi va ushbu maqsadlarga jami 240 mlrd so‘m yo‘naltiriladi. Mahallalar faoliyatini uslubiy qo‘llab-quvvatlash va mutaxassislarni o‘qitish uchun esa Milliy mahalla taraqqiyoti instituti tashkil etiladi.
