O‘zbekiston birinchi xonimi Ziroat Mirziyoyeva Albaniya birinchi xonimi Armanda Begay bilan uchrashdi. Mehmon uchun milliy hunarmandchilik namunalari va “Kelin salom” marosimi namoyish etildi.
Suhbat davomida ikki davlat rahbarlarining rafiqalari O‘zbekiston va Albaniya xalqlari o‘rtasidagi do‘stlik hamda o‘zaro hamjihatlikni mustahkamlash masalalarini, shuningdek, madaniy-gumanitar hamkorlikni kengaytirish istiqbollarini muhokama qildilar.
Tashrif doirasidagi madaniy dastur davomida Armanda Begay o‘zbek amaliy san’ati ustalarining ijod namunalari bilan yaqindan tanishdi. Unga quyidagi milliy hunarmandchilik turlari namoyish etildi:
-
Yog‘och o‘ymakorligi namunalari;
-
Qadimiy so‘zana kashtachilik texnikasi;
-
An’anaviy o‘zbek kulolchilik buyumlari.
Dasturning eng yorqin va esda qolarli lahzalaridan biri an’anaviy o‘zbek milliy liboslari ko‘rgazmasi hamda mamlakatimizning turli hududlariga xos bo‘lgan o‘ziga xos xususiyatlarni aks ettiruvchi “Kelin salom” marosimi taqdimoti bo‘ldi. Albaniya birinchi xonimi o‘zbek xalqining milliy an’analari va urf-odatlariga chinakam qiziqish bildirib, ularning chuqur tarixiy ildizlari, go‘zalligi hamda betakrorligini alohida e’tirof etdi.
