Jizzax shahrida Gentra rusumli avtomobil daraxtga borib urilishi oqibatida 21 yoshli bloger Orzigul Urazmatova shifoxonada vafot etdi. Avtomashinadagi 18 yoshli yo‘lovchi shifoxonaga yotqizildi.
Jizzax shahrida odam o‘limi bilan yakunlangan navbatdagi mudhish yo‘l-transport hodisasi sodir bo‘ldi. Avtohalokat oqibatida 21 yoshli taniqli bloger Orzigul Urazmatova hayotdan ko‘z yumdi.
Yo‘l-transport hodisasi 5-avgust kuni tungi soat 03:00 larda Jizzax shahriga qarashli “O‘ratepalik” mahallasi hududidan o‘tuvchi avtomobil yo‘lida yuz bergan. Sharof Rashidov tumanida istiqomat qiluvchi, 2005-yilda tug‘ilgan haydovchi O.U. (Orzigul Urazmatova) o‘ziga tegishli bo‘lgan Gentra rusumli avtomashinasida harakatlanib ketayotib, kutilmaganda rul boshqaruvini yo‘qotgan. Boshqaruvdan chiqib ketgan transport vositasi yo‘lning o‘ng chetidagi daraxtga juda kuchli zarba bilan borib urilgan.
YTH natijasida haydovchi o‘ta og‘ir tan jarohatlari olgan va zudlik bilan Jizzax viloyati tibbiyot birlashmasining jonlantirish (reanimatsiya) bo‘limiga yotqizilgan. Biroq shifokorlar tomonidan barcha zaruriy va shoshilinch tibbiy muolajalar ko‘rsatilishiga qaramasdan, qizning hayotini saqlab qolishning imkoni bo‘lmadi va u shifoxonada vafot etdi.
Shuningdek, avtomashina salonida yo‘lovchi sifatida kelayotgan 18 yoshli fuqaro I.M. (2008-yilda tug‘ilgan) ham jarohat olib, zudlik bilan shifoxonaga yetkazilgan. Hozirda unga malakali tibbiy yordam ko‘rsatilmoqda. Mazkur mudhish holat yuzasidan Jizzax shahar IIB Tergov bo‘limi tomonidan tegishli tartibda tergovga qadar tekshiruv va surishtiruv harakatlari olib borilmoqda.
O‘zbekiston hududida 2026-yilning yanvar-iyun oylari oralig‘ida jami 2 286 ta yo‘l-transport hodisasi rasman qayd etilgan. Ushbu YTHlar oqibatida jabrlanganlar va tan jarohati olganlar soni 3 306 nafarni tashkil etgan. Statistikaga ko‘ra, eng ko‘p yo‘l-transport hodisalari Toshkent shahri hisobiga to‘g‘ri kelgan bo‘lsa, eng kam ko‘rsatkich Buxoro viloyatida qayd etilgan.
